1028.
हरीनामाचे करूनि तारू । भवसिंधुपार उतरलो ॥१॥
फावले फावले आता । पायी संता विनटलो ॥धृपद॥
हरीनामाचा शस्त्र घोडा । संसार गाढा छेदिला ॥२॥
हरीनामाची धनुष्यकांडे । विन्मुख तोंडे कळिकाळ ॥३॥
येणे चि बळे सरते आम्ही । हरीचे नामे लोकी तिही ॥४॥
तुका म्हणे जालो साचे । श्रीविठ्ठलाचे डिंगर ॥५॥

अर्थ :
मी या हरिनाम रुपी नामाची नौका करून हा भवसिंधु पार उतरलो आहे. मला हे सर्व काही प्राप्त झाले ते केवळ संतांमुळे कारण मी त्यांच्या पायी लागलो आहे. हरी नाम रूप वेगवान घोडा आणि ज्ञानरूप शस्त्र घेऊन आम्ही या गाढ संसाराचा समूळ छेद केला आहे. हरी नाम रूप बाणामुळे कळिकाळ देखील तोंड विन्मुख करून पळून गेला. या हरिनामाचा बळामुळेच आम्ही तिन्ही लोकामध्ये मान्यतेला प्राप्त झालो आहोत. तुकाराम महाराज म्हणतात आम्ही या विठ्ठलाचे भक्तीभावपूर्ण सेवक झालो आहोत.