890.
पाहा रे हे दैवत कैसे । भक्तीपिसे भाविका ॥१॥
पाचारिल्या सरिसे पावे । ऐसे सेवे बराडी ॥धृपद॥
शुष्क काष्ठी गुरुगुरी । लाज हरी न धरीता ॥२॥
तुका म्हणे अर्धनारी । ऐसी धरी रूपडी हा ॥३॥

अर्थ :
अहो पहा ओ पहा हे आमचे दैवत कसे आहे ? ते भक्ती वश झालेले आहे. कोणीही त्याला हाक मारली त्याला बोलावले कि तो लगेच धावत येतो. अहो प्रल्हादासाठी या हरीने शुष्क खांबातून नरसिंह रुपात गुरगुर करून प्रकट होण्यास लाज धरली नाही. तुकाराम महाराज म्हणतात की, हा देव भक्तांच्य सहाय्यास कधी नर तर कधी नारीचे रूप घेतो व तत्परतेने धावत येतो.